‘n KwaZulu-Natalse pa staan tereg op ‘n aanklag van nalatigheid, nadat sy tienerseun na bewering sy vuurwapen skool toe geneem het.
Konstabel Thenjiswa Ngcobo, provinsiale polisiewoordvoerder, sê die voorval het op 23 Junie in die Mtubatuba-omgewing plaasgevind. Volgens verslae is die 17-jarige in hegtenis geneem en van die onwettige besit van ‘n vuurwapen en ammunisie aangekla.
Konstabel Ngcobo sê die pa is van die nalatige verlies van ‘n vuurwapen aangekla.
“Albei het in die Mtubatuba-landdroshof verskyn en is vrygelaat.”
Muzi Mahlambi, woordvoerder van die provinsiale onderwysdepartement, het gesê hulle is ontsteld oor die voorval.
“Ons weet dat wanneer dit by die beheer van ‘n vuurwapen kom, dit onwettig is as dit nie veilig bewaar word nie. Kinders mag nie toegang daartoe kry nie.
“Ons kan dalk ‘n ander gesprek voer as die vuurwapen gebruik is, maar omdat dit ‘n saak is wat voor die polisie is, sal ons hulle ruimte gun om die kwessie te hanteer.”