Die sosiale media maatskappy, Twitter, het bevestig dat dit hom tot die howe sal wend, nadat die miljardêr Elon Musk gister in ’n brief aangekondig het dat hy nie met sy kooptransaksie van $44 miljard (oftewel R740 miljard) om Twitter te bekom sal voortgaan nie.
Twitter sê in ’n verklaring dat dit kontrakbreuk op verskeie bepalings en voorwaardes is, en dat dit Musk deur regstappe sal dwing om voort te gaan met die oorspronklike ooreenkoms wat in April 2022 onderteken is.
Twitter se voorsitter, Bret Taylor, het getwiet dat die maatskappy “toegewyd is om die transaksie te beklink op die aanbod en voorwaardes waarop met Musk ooreengekom is en beplan om regstappe te neem om die ooreenkoms af te dwing.”
“Ons is vol vertroue dat ons sal seëvier in die Delaware-hof,” het hy bygevoeg.
Die Suid-Afrikaans gebore uitvoerende hoof van Tesla het voorheen gedreig om die ooreenkoms te staak, tensy die maatskappy bewys het dat gemorspos en vals rekeninge (botte) minder as 5% van sy totale gebruikers is. Musk meen dat hy nie voldoende bewyse in die verband ontvang het nie.
Verlede maand het Twitter aan Musk toegang tot sy “brandslang” (firehose) gegee, wat die stoorplek van rou data van honderde miljoene daaglikse twiets en gebruikers is.
Musk staar egter nou ’n uitgerekte hofstryd in die gesig, wat hom kan dwing om weer te onderhandel, die aanbod te aanvaar of teen ’n sekere bedrag te skik.
Twitter het vandag 5% van sy markwaarde na Musk se aankondiging verloor.
