Jaco Mulder, VF Plus-LP en provinsiale leier, het in ’n verklaring gesê dat President Ramaphosa se hernieude oproep om te volhard met breëbasis- swart ekonomiese bemagtiging (BBSEB) as kernmeganisme vir ekonomiese transformasie, die gebrek aan politieke kapitaal en die ‘blaamverskuiwingspolitiek’ deur die ANC-regering bevestig.
Ramaphosa het Woensdag tydens sy openingstoespraak vir die kongres van swart nyweraars en uitvoerders in Sandton, onder meer gesê dat wetgewing gewysig moet word om voorkeurverkryging deur die regering tot voordeel van swart entrepreneurs te bevorder.
“Ramaphosa se toespraak is deurtrek van blaamverskuiwing en ontken die verwoestende nagevolge van 28 jaar onder ’n swak ANC-regering wat die land se ekonomie onder staatskaping, die bankrotskap van staatsinstellings soos Eskom en die ineenstorting van munisipale dienslewering laat steier en werkloosheid laat hoogty vier,” sê Mulder.
Volhoubare ekonomiese groei en bemagtiging kan slegs plaasvind wanneer daar beleggingsvertroue in die land is en tenders en aanstellings op meriete plaasvind, meen Mulder.
Die VF Plus sê dat die ‘herverdeling van rykdom’ die ‘herverdeling van armoede’ bevorder.
Die VF Plus beywer hom vir ’n veelparty-koalisieregering ná die 2024-verkiesing vry van ‘die ANC se korrupsie en blaamverskuiwing.’
Die politieke party sê dat Suid-Afrika beter as die ANC verdien.