Kapt. Frederick van Wyk, polisiewoordvoerder in die Wes-Kaap, het bevestig dat lede verbonde aan die reeks- en elektroniese misdaadondersoekeenheid (SECI), en Worcester se eenheid teen gesinsgeweld, kinderbeskerming en seksuele oortredings (FCS) ’n 58-jarige senior pastoor van ’n kerk in Worcester in hegtenis geneem het.
Ondersoeke van voorvalle wat strek tussen 2016 en 2022, het aan die lig gebring dat die pastoor die ouers van kinders misbruik het.
AfriNuus het vroeër berig dat ’n vrouepastoor ouers omgepraat het om toe te laat dat hulle kinders by haar huis oorslaap, onder die voorwendsel dat sy hulle liggaamsmate sal neem vir die maak van swembroeke. Kinders is toe ontklee, bedwelm, betas en kaalfoto’s van hulle is geneem.
“Een van die slagoffers het gesê die verdagte het haar in ‘n slaapkamer toegesluit en vir haar gesê om uit te trek en nie ongemaklik te wees nie, omdat hulle albei vroue is. Sy het toe verskeie kaalfoto’s van haar in verskeie dele van die kamer geneem.
“Ondersoeke het aan die lig gebring dat die verdagte en haar man albei reeds 15 jaar vir die verkragting van minderjarige kinders uitgedien het.”
Die 58-jarige vrou word aangekla van vyf aanklagte van mensehandel, twee aanklagte van verkragting, sowel as 100 aanklagte van die besit en skep van kinderpornografie.
Ondersoeke is aan die gang aangesien dit lyk of meer slagoffers na vore kom.
Die pastoor is op 11 Julie 2022 in hegtenis geneem en het op 13 Julie 2022 in die hof verskyn. Die saak is tot 19 Julie 2022 vir ’n formele borgtogaansoek uitgestel.
Die man van die pastoor is op 25 Julie 2022 gearresteer en hy sal saam met sy vrou vandag (26 Julie 2022) by die Worcester-landdroshof op die genoemde aanklagte verskyn.
Opdatering:
Die man van die pastoor het vandag in die Worcester-landdroshof verskyn. Die man sluit by sy vrou aan as haar medebeskuldigde. Die saak teen beide beskuldigdes is tot 4 Augustus 2022 vir ’n formele borgtogaansoek uitgestel. Die vrou se regsverteenwoordiger het verlede week onttrek, maar sy het aan die hof gesê sy gaan ’n nuwe prokureur aanstel wat gereed sal wees om voort te gaan met haar borgtogaansoek.