Tertius Simmers, leier van die DA in die Wes-Kaap, het gesê dat die politieke party in die Wes-Kaap ontsteld is oor Fikile Mbalula, minister van vervoer, se stelling dat die “SAPD mense moet skiet” wat plakkershutte (shacks) op die spoorlyn in Kaapstad oprig. Dié verklaring is volgens die DA gister by die gedeeltelike heropening van die Kaapstad-sentrale spoorlyn gemaak.
“Nie net was die heropening ’n totale ramp nie, aangesien die trein vertraag is en toe tussen stasies vasgeval het, maar Mbalula se roekelose opdrag aan polisiebeamptes om mense op die spoorlyn te skiet, is niks anders as ’n misdaad nie,” sê Simmers. “Is Mbalula se idee om die kwessie van behoeftige en hawelose mense op die sentrale lyn op te los om hulle te skiet?”
Volgens Simmers is Mbalula se ‘walglike’ benadering die direkte teenoorgestelde van dié wat Kaapstad se burgemeester, Geordin Hill-Lewis, aangekondig het. Hill-Lewis sê dat hy “wil oorskakel van ’n wetstoepassingsgedrewe benadering na ’n ingrypingsprogram” waar die fokus sal wees om hawelose mense te help om van die strate af te kom.
Die DA sluit af deur ’n beroep op die minister te doen om die verklaring onmiddellik terug te trek en die publiek om verskoning te vra. “Hy moet eerder op sy werk fokus en toesien dat wanneer hy spoorlyne met soveel probleme soos gister oopmaak, die treine werklik behoorlik werk.”