Drie van die vier verdagtes wat daarvan beskuldig word dat hulle die besittings gesteel het van die 21 jongmense wat by die Enyobeni-taverne in Oos-Londen gesterf het, sal vir eers in aanhouding bly.
Die beskuldigdes het Dinsdag vlugtig in die landdroshof in Oos-Londen verskyn.
Luzuko Tyali, die woordvoerder van die nasionale vervolgingsgesag (NVG) in die Oos-Kaap, het bevestig dat hulle borgtogverhoor op Maandag, 1 Augustus, aangehoor sal word.
Die beskuldigdes is tussen die ouderdomme van 16 en 21 en is vroeër vandeesmaand ná ’n ondersoek deur die polisie in hegtenis geneem.
’n Vierde beskuldigde, wat minderjarig is, is in die aanhouding van sy ouers vrygelaat.
Die verdagtes is geïdentifiseer as Aphiwe Rawutini (21), Sinobomi Ntyintyi (21) en Someleze Dyani (22).
Die minderjarige verdagte mag nie genoem word nie en sal nie Maandag saam met sy medebeskuldigdes verskyn nie.
AfriNuus het vroeër berig dat verskeie gesteelde items, wat positief deur die slagoffers se naasbestaandes geïdentifiseer is, in die huis van die verdagtes teruggevind is.
Die polisie het gesteelde skoene, pruike en klere teruggevind wat behoort aan van die tieners wat in die vroeë oggendure van 26 Julie onder geheimsinnige omstandighede, wat na bewering verband hou met die inname van brousels wat metanol bevat, gesterf het.
Die taverne-eienaar is ’n dagvaarding uitgereik om op 19 Augustus in dieselfde hof te verskyn. Hy word aangekla vir die oortreding van die Drankwet, aangesien die man alkohol aan kinders onder die ouderdom van 18 verkoop of verskaf het.