Nicky Mills, provinsiale bevelvoerder van die eenheid teen gesinsgeweld, kindermishandeling en seksuele oortredings (GKS), het die veelvuldige vonnisse wat op 28 Julie 2022 in die Calvinia-streekhof aan ’n 50-jarige man opgelê is vir die verkragting van sy 8-jarige biologiese dogter en buurvrou se 15-jarige dogter, verwelkom.
Op 11 November 2013 het ’n buurvrou in Brandvlei in die Noord-Kaap ’n klag van verkragting teen die 50-jarige vir die verkragting van haar 15-jarige dogter gelê. Hy is in hegtenis geneem en borgtog is suksesvol teengestaan.
Die klaer het later uit Brandvlei getrek en kon nie opgespoor word nie. Die saak is daarna deur die senior staatsaanklaer teruggetrek.
Op 19 Junie 2021 het sy vrou en ma van die 8-jarige meisie ’n klag teen dieselfde beskuldigde, haar man, aanhangig gemaak vir die verkragting van hul 8-jarige dogter op verskeie geleenthede.
Die beskuldigde is in hegtenis geneem en die eerste klaer is in Upington opgespoor, waarna die saak weer op die hofrol geplaas is.
Die 50-jarige man is op 3 aanklagte van verkragting op sy biologiese dogter vir 40 jaar elk gevonnis.
Hy is ook skuldig bevind aan die verkragting van sy buurvrou se 15-jarige dogter en tot nog 20 jaar gevonnis.
Die vonnisse sal samelopend uitgedien word.
Die bestuur van die Noord-Kaapse SAPD het sersant Jaco Swartz en konstabel Jacques Nielsen van die Calvinia SAPD bedank vir hul noukeurige ondersoeke wat gelei het tot die aanhouding van die oortreder.
