Twee vroue, Florida Owusu en Abongile Tyusha, albei 28 jaar oud, het gister vlugtig in die gespesialiseerde handelsmisdaadhof in Gqeberha verskyn. Die twee voormalige Absa-werknemers staar 31 aanklagte van bedrog, 80 aanklagte van diefstal en 90 aanklagte van geldwassery in die gesig.
“Tussen November 2019 en Oktober 2020 het die beskuldigdes by die bank se Patensie-tak gewerk,” sê Luxolo Tyali, woordvoerder van die nasionale vervolgingsgesag (NVG) in die Oos-Kaap. “Tyusha is later as verkoopskonsultant na die Dutywa-tak oorgeplaas. Hulle het ’n uitgebreide skema begin terwyl hulle by die twee takke was. Die twee beskuldigdes het na bewering bankrekeninge oopgemaak in die name van oorlede persone en ’n Chinese buitelandse burger wie se paspoort verval het.”
Die beskuldigdes het toe sommige kliënte se rekeninge uitgeken. Die beskuldigdes het by verskeie geleenthede bedrae van tussen R4 500 en R370 000 oorgeplaas na die rekeninge wat hulle op ’n bedrieglike wyse geskep het, en die geld tot hul voordeel gebruik. Die duo is deur die Valke in hegtenis geneem.
Die staat het nie borgtog teengestaan nie en die hof het die beskuldigdes op borgtog van R1 000 elk vrygelaat. Hul saak is tot 31 Augustus 2022 uitgestel vir die beskuldigdes om regshulp te kry en vir verdere aanklagtes om bygevoeg te word.