Die Kaapse metro se verkeersdienste het die afgelope week 110 motoriste in hegtenis geneem, insluitend ’n man wat 33 uitstaande lasbriewe vir inhegtenisneming gehad het.
Volgens die metro is die man op Vrydag, 29 Julie, in Athlone in hegtenis geneem. Die totale waarde van die 33 verkeersboetes is R97 700.
Die man het in die hof verskyn en borgtog is op R25 800 vasgestel.
Hy kon egter nie die bedrag betaal nie en bly in aanhouding by die omstrede Pollsmoor-gevangenis in Tokai buite Kaapstad tot sy volgende hofverskyning.
Die Kaapse metro het nie sy naam bekend gemaak nie.
Van die 110 motoriste wat die afgelope week in hegtenis geneem is, is 94 vir dronkbestuur en 16 vir roekelose en nalatige bestuur in hegtenis geneem.
Altesaam 67 047 verkeersoortredings is aangeteken. Beamptes het ook 159 voertuie geskut en 1 637 lasbriewe vir inhegtenisnemings uitgevoer.
Dieseldiewe op heterdaad betrap:
In ’n onverwante voorval is vier dieseldiewe vanoggend in die vroeë oggendure deur stadsverkeersbeamptes in Parow op heterdaad betrap – hulle is onder minstens 213 verdagtes wat die afgelope week deur die metro se verkeers- en wetstoepassingsdepartemente in hegtenis geneem is.
Verkeersbeamptes het vanoggend om 04:10 op die vier verdagtes afgekom terwyl hulle diesel van ’n vragmotor wat in Parow geparkeer het, uitgetap het – die bestuurder het in die voertuig geslaap.
Die verdagtes het ongeveer 125 liter diesel uitgetap toe beamptes op die toneel aangekom het.
Beamptes het ’n groot aantal dromme en pype gevind wat gebruik is om die diesel te onttrek. Hulle het ook ’n Toyota Quantum, wat deur die verdagtes gebruik is, geskut – die voertuig se nommerplate is verwyder.
Vier mans, onderskeidelik 26 ,28, 31 en 39 jaar oud, is in hegtenis geneem en na die Parow-polisiestasie geneem.
“Terwyl die verskynsel nie nuut is nie, is hierdie tipe voorval iets anders, en was dit ’n ongelooflike opportunistiese en gevaarlike ding om doen. Selfs al het die verdagtes weggekom, sou dit baie riskant gewees het om met groot hoeveelhede brandstof in tydelike houers te reis. Alhoewel dit moeilik is om oor die motief te spekuleer, is dit waarskynlik dat die koste van brandstof ’n faktor was. Genadiglik is die vragmotorbestuurder nie beseer nie. In die lig van hierdie voorval doen ons ’n beroep op die vragmotorbedryf, maar motoriste in die algemeen, om asseblief ten alle tye wakker te wees,” sê die metro se burgemeesterskomiteelid vir veiligheid en sekuriteit, JP Smith, in ’n verklaring.
