Xolile Mbatha (23), ’n elektriese ingenieurstudent, is in haar koshuiskamer by die Mangosuthu-Universiteit vir Tegnologie (MUT) in Durban vermoor. Die student is die naweek na bewering deur iemand wat sy ken in die koshuis doodgesteek. Haar lyk is Sondagoggend gevind.
In ’n verklaring het MUT se waarnemende visekanselier, professor Marcus Ramogale, gesê:
“Ek het geen woorde om hierdie verskriklike daad te beskryf wat deur ’n manlike medestudent by die Ark Royal Residence, een van MUT se buite-koshuise, verrig is nie.”
“Die moord vorm deel van die polisieondersoek. Daar word vermoed dat die manstudent van die toneel gevlug het en steeds op vrye voet is. Terwyl MUT probeer om besonderhede te kry van wat Sondagoggend gebeur het, doen ons ’n beroep op personeel, studente en die publiek om saam met die polisie te werk en na vore te kom indien enigiemand inligting het wat met die ondersoek kan help.”
Nqobile Gwala, polisiewoordvoerder in KwaZulu-Natal, het die voorval aan AfriNuus bevestig.
Op 31 Julie 2022, om 07:30, is polisielede verbonde aan die Point-polisiestasie na ’n woning by Mahatma Gandhiweg ontbied waar ’n 23-jarige vrou met ’n mes gesteek en vermoor is.
“Daar word beweer dat die slagoffer deur ’n bekende verdagte vermoor is ná ’n huishoudelike dispuut. Sy is op die toneel dood verklaar.”