AO Mmako Mophiring, Vrystaatse polisiewoordvoerder, het bevestig dat die Suid-Afrikaanse Polisiediens (SAPD) ’n verdagte op aanklag van moord in hegtenis geneem het, nadat hy na bewering sy vriend met ’n ysterstaaf doodgeslaan het.
Daar word beweer dat polisiebeamptes op Maandag, 1 Augustus 2022, om 11:00 na ’n klag van moord in die Maboshwane Village in Qwaqwa ontbied is. Polisiebeamptes het in die huis ingegaan waar die lyk van ’n man op die vloer gelê het. Hy is later as Sipho Mosia geïdentifiseer.
Daar word verder beweer dat die twee vriende die oggend om 05:00 van ’n kuier by die huis aangekom het en dat hulle albei naby ’n koolstoof gesit het terwyl hulle bier gedrink het. Die twee het gestry wat in ’n bakleiery ontaard het.
“Die verdagte het die slagoffer met ’n ysterstaaf op die kop geslaan,” sê Mophiring. “Die verdagte is later by die Phuthaditjhaba-landdroshof in hegtenis geneem, terwyl hy ’n ander saak waar hy ’n beskuldigde is, bygewoon het.”
Hy sal na verwagting op Woensdag, 3 Augustus, in die Phuthaditjhaba-landdroshof verskyn op aanklag van moord.