Die Oornameregulasiepaneel (TRP) het Rain beveel om sy verklaring wat sy plan aangekondig het om Telkom se direksie te nader oor ’n moontlike samesmelting van die twee maatskappye, terug te trek.
Volgens die TRP, wat deel vorm van die departement van handel, nywerheid en mededinging, het Rain die aankondiging sonder toestemming gedoen. Die selfoonmaatskappy word verder daarvan beskuldig dat hy maatskappyregulasies verontagsaam het.
“Ons wil die mark inlig dat die aankondiging deur Rain uitgereik is sonder die vooraf goedkeuring van die TRP soos vereis word, ingevolge regulasie 117 van die maatskappyregulasies,” lui ’n verklaring deur die reguleerder.
“Die aankondiging is uitgereik in stryd met TRP se instruksies aan Rain dat geen sodanige aankondiging gemaak moet word sonder die vooraf goedkeuring van die reguleerder nie.
“Gevolglik is die verklaring van die aankondiging deur Rain onwettig, en Rain is opdrag gegee om die aankondiging terug te trek. In die omstandighede word alle partye (aandeelhouers) en die mark aangeraai om die aankondiging te ignoreer.”
Rain het bevestig dat dit regsadvies inwin.