Suid-Afrika se jongste selfoonnetwerk, Rain, het in ’n verklaring bevestig dat dit ’n versoek gerig het aan die Telkom-direksie om ’n voorstel voor te lê vir die twee maatskappye om moontlik saam te smelt.
Volgens Rain sal die Telkom-Rain-samesmelting ’n ‘5G-kragstasie’ skep as ’n sterk derde rolspeler om te kompeteer met die ‘duopolie’ (Vodacom en MTN).
Telkom is tans in gesprekke oor ’n moontlike oorname deur MTN.
“Die potensiële voordele van ’n samesmelting tussen Telkom en Rain is enorm. Die aantal gekombineerde Rain- en Telkom-terreine sal gelykstaande wees aan dié van Vodacom en MTN,” sê Brandon Leigh, uivoerende hoof van Rain. “Dit sal ook die duplisering van terreine vermy en wesenlike kapitaal- en bedryfskostebesparings tot gevolg hê.”
Alhoewel die bepalings van so ’n transaksie soos waardasie en struktuur nog ooreengekom moet word, glo Rain daar is aansienlike waarde vir die kombinasie van die besighede.
“Telkom en Rain sal saam in staat wees om voort te gaan om gestelde doelwitte te bereik terwyl sy groei versnel. Dit is ‘n logiese alternatief as om bloot aan MTN te verkoop en sal ook ooreenstem met die pro-mededingende beleid van die regering.”
Die samesmelting sal die aansienlike infrastruktuur en mobiele ondernemings van Telkom en die suksesvolle nuwe era 4G- en 5G-ondernemings van Rain bymekaar bring.
Leigh het gesê Rain het min skuld en voldoende fasiliteite om sy groei te finansier en Telkom se finansiële verliese om te keer.
Lees gerus Rain se mediaverklaring hieronder:
rain-press-release_10-August-2022