Zolile Williams, LUR vir Oos-Kaapse departement van samewerkende regering en tradisionele sake (Cogta), het die skietaanval op die waarnemende munisipale bestuurder van Buffalo City, Nceba Ncunyana, veroordeel.
Die skietvoorval het Vrydag, 26 Augustus, plaasgevind toe die waarnemende munisipale bestuurder die aand by die huis aangekom het.
Volgens Brigadier Tembinkosi Kinana, provinsiale polisiewoordvoerder, het die aanval op Ncunyana plaasgevind toe ’n gewapende man uit ’n Volkswagen Polo geklim en skote op die waarnemende munisipale bestuurder afgevuur het, terwyl sy sekuriteit teruggeskiet het.
Ncunyana is in die arm gewond terwyl hy in sy voertuig gesit het. Die onbekende gewapende man het daarna van die toneel gevlug.
Nog niemand is in hegtenis geneem nie, maar ’n saak van poging tot moord word ondersoek.
In September 2021 is Ncunyana ook by sy huis aangeval.
LUR Williams het verder vir Ncunyana ’n spoedige herstel toegewens.
“Munisipale amptenare regoor die provinsie mag nie geïntimideer word of op geskiet word wanneer hulle hul take uitvoer nie,” sê LUR Williams.
Die LUR doen ’n beroep op gemeenskappe om inligting aan die polisie te verskaf wat hulle sal help om die plegers van hierdie afskuwelike aanval op te spoor.
Verder het die LUR die wetstoepassingsagentskappe gevra om alles moontlik te doen om die skuldiges vas te trek. “ ’n Aanval op enige munisipale amptenaar wat getrou sy verantwoordelikhede uitvoer om dienste na die mense te neem, is ’n aanval op die welstand van die mense van die provinsie,” sê LUR Williams.
