Die Minister van Kommunikasie, Khumbudzo Ntshavheni, het ’n omvattende konsepplan aangekondig om 2G- en 3G-toestelle se konnektiwiteit af te skakel, wat oor so min as nege maande begin. Minister Ntshavheni noem dit die “volgende generasie radiofrekwensiespektrum”. Dit sal die verbod op die lisensiëring van alle 2G- en 3G-toestelle insluit, asook die opskorting van dienste op hierdie netwerke.
“Miskien moes die Minister met die burgers van hierdie land gepraat het voordat sy so ’n stap aangekondig het,” meen Dianne Kohler Barnard, DA-skaduminister van kommunikasie. “Een van die mees bedreigde groepe in Suid-Afrika, ons plattelandse boere, maak byna slegs op 2G- en 3G-toestelle staat. As sy dit nagegaan het, is hierdie inligting maklik verkrygbaar.”
Volgens die party is dit eerstens belangrik om daarop te let dat 4G- en 5G-toestelle aansienlik duurder is as 2G- en 3G-toestelle is. Dit beteken dat Suid-Afrikaners wat tans die 2G- en 3G-netwerke gebruik, sal sien dat hul toestelle nutteloos gemaak word. Burgers wat dit nie kan bekostig nie, sal dan gedwing word om meer geld te bestee, net om aan ’n netwerk gekoppel te bly.
“Die lewens van boere en plaaswerkers, wat daarop staatmaak om bure te kontak wanneer hulle aangeval word, sal in gevaar gestel word,” voeg Barnard by.
Vodafone het onthul dat sowat 6 miljoen 2G-toestelle jaarliks in Suid-Afrika verkoop word en dat sowat 14 miljoen van sy kliënte steeds 2G-selfone gebruik.
Suid-Afrika is nie alleen hierin nie, aangesien groot getalle mense wêreldwyd steeds van 2G-netwerke afhanklik is, en die oorgrote meerderheid splinternuwe, top-van-die-lyn fone op die mark vandag het geen manier om 2G-ondersteuning af te skakel nie.
“Alhoewel daar planne is om 2G- en 3G-netwerke uit te faseer om meer ruimte te maak vir 5G-vermoë, moet hierdie Minister eers ’n metode vind waardeur die oorgrote meerderheid Suid-Afrikaanse burgers hierdie veranderinge sal kan bekostig,” meen Barnard.
Daar word beraam dat tienduisende verskillende Android-fone sal ophou werk sodra die 2G- en 3G-netwerke gesluit is.
Ouer toestelle kan heeltemal ophou werk, die vermoë verloor om SMS-boodskappe te stuur, oproepe te maak of aan die internet te koppel. Dit sluit tablette, sekere mediese waarskuwingstoestelle, slimhorlosies en sekuriteitstelsels in.
Binne die bedryf is daar groot kommer oor die koste verbonde aan die oorskakeling na meer gevorderde tegnologieë, sowel as die kliënt se afhanklikheid van 2G vir masjien-tot-masjien toepassings.
Die Kabinet het die beleid en die publikasie van die Next Generation Radio Frequency Spectrum-konsep goedgekeur en dit sal vir publieke kommentaar oop wees.
“Dit moet meer as ’n regmerkie-oefening wees, en ’n volledige impakbepaling moet onderneem word, maar dan moes dit onderneem gewees het voordat hierdie beleid goedgekeur is,” voeg Barnard by.