Die tonele wat Sondagoggend in Jagersfontein afgespeel het, toe swaar mynslik deur huise, oor paaie en groot weivelde gespoel het, is wyd op sosiale media gedeel.
Honderde diere is ook in die ramp dood, terwyl die Dierebeskermingsvereniging (DBV) in Bloemfontein daarin kon slaag om honderde ander te red.
Volgens Reinette Meyer, DBV in Bloemfontein se hoofinspekteur, is ’n totaal van meer as 586 diere teen Woensdag gered nadat die DBV ingegryp het en diere gehelp het wat deur die slikramp geraak is. Meeste van die diere was hoenders, het die organisasie aan AfriNuus bevestig.
“Ons harte is met elke dier tydens hierdie ramp en ons vind voortdurend diere wat in huise, dakke en bome wegkruip,” lui ’n verklaring deur die DBV in Bloemfontein. “Dit is moeilike plekke om te bereik, maar ons kry dit reg om by hulle uit te kom. Ons verwyder hulle uit die modder en was hulle met water om alle oortollige modder te verwyder.”
“Ons weet dat katte nie van water hou nie, maar deur die modder van hulle te verwyder, kan ons die verligting sien.”
“Geharde DBV-inspekteure moet die trane terughou, want ons kan nie nou huil nie. Weereens het Bloemfontein se DBV bakkies vol diere gelaai wat hulp van veeartse, tydelike huisvesting en aandag nodig het. Die verwoesting is groot en die gebrokenheid van mens en dier is tasbaar. Die kleinste kreature, krappe, slang en skilpaaie verdien ook ons onverdeelde aandag en tyd.
“Ongelukkig het so baie reeds gesterf, veral wilde diere. Die getalle en verwoesting is ondenkbaar.”
Maandag kon die DBV 69 honde, 39 katte, 3 varke, 102 hoenders, 2 koeie en 19 ganse bystaan. Dit was net een dag. Teen vandag is dit bykans 600 diere.
Besoek http://bloemfonteinspca.co.za/ om ’n bydrae te maak.
Beeldmateriaal in die video: DBV Bloemfontein (Facebook).