Die veiligheidsmaatskappy, Marshall Security, het Dinsdag in ’n verklaring bevestig dat ’n taxibestuurder met noodlottige skietwonde gevind is ná ’n kaping gisteraand in Durban, waarna lede voortgegaan het om die voertuig binne ’n uur op te spoor. Meeste van die onderdele van die voertuig is reeds gesteel.
“Maandag om 19:20 is die Marshall Security-noodsentrum in kennis gestel van ’n moontlike voetgangervoertuigongeluk. Gewapende reaksie-beamptes en lede van Spesiale Operasie is onmiddellik na die toneel gestuur waar aanvanklike berigte aangedui het dat ’n voetganger deur ’n Toyota Quantum-taxi op Noordkusweg in die Avoca-omgewing getref is, en dat die taxi van die toneel gevlug het,” sê Tyron Powell, woordvoerder van Marshall Security.
Met hul aankoms en ondersoek het die maatskappy se lede vasgestel dat dit nie ’n voetgangervoertuigongeluk was nie, maar ’n kaping, en dat die taxibestuurder tydens die voorval noodlottig geskiet en langs die pad gelaat is. Die toneel is onmiddellik deur die span afgesper om die misdaadtoneel vir bewysinsameling te bewaar sodra die Suid-Afrikaanse Polisiediens (SAPD) opgedaag het. ’n Gebruikte 9 mm-patroon is ook op die toneel gevind.
“Kort daarna is lede van ons Spesiale Operasie-span deur Tracker SA geaktiveer om te help met die opspoor van die gekaapte taxi. Ons lede het dadelik gereageer op die laaste bekende ligging van die voertuig en motorsitplekke, deurpanele en hoofligte teruggevind, maar die res van die taxi was steeds vermis,” lui die verklaring verder.
Vasbeslote om die voertuig te vind, het die span saam met die Tracker SA voortgegaan om ’n deeglike soektog in die area te doen en dit wat oorgebly het van die taxi sowat 400m verder gevind. Binne ’n uur nadat die gekaapte voertuig gevind is, het die verdagtes die taxi heeltemal uitmekaar getrek. ’n Soektog is na die gesoekte kapers gedoen, maar hulle het spoorloos gevlug.
Greenwood Park SAPD sal ’n saak van kaping en moord ondersoek.
“Dit is die derde voorval met ’n soortgelyke modus operandi waar Toyota Quantum-taxibestuurders die afgelope twee maande op Noordkusweg gekaap is,” voeg die veiligheidsmaatskappy by.
