Deur Francine Prins (Lig-redakteur)
“My ma is my grootste bewonderaar, en my man my grootste kritikus. En dit is die perfekte span om agter jou te hê!”
So vertel Leah, sangeres, TV-aanbieder en aktrise. “Soms het ’n mens dit mos nodig dat iemand vir jou sê jy het goed gevaar. My ma ondersteun my dikwels op so ’n manier.
“En ek is baie dankbaar vir my man Hennie, want hy sal vir my sê as ek dalk van die noot af gesing het.” Sy lag. “Of as ek te veel nonsens op die verhoog gepraat het!”
Blaai jy deur Leah se onderskeie sosiale mediaprofiele, sien jy die een groot glimlag ná die ander. Sy lyk oral en altyd gelukkig.
Is dit eg? Wonder jy.
Haar antwoord is eenvoudig: “Ek wil graag hê mense wat daardie profiele besoek, moet goed voel. Dis mos lekker om na iets te kyk wat jou opbeur. Daarom sorg ek dat ek nie negatief is nie, dat ek eerder die positiewe en die goeie beklemtoon.
“Ek hou nie ’n vals beeld voor nie. Maar daar is soveel negatiewe dinge in die wêreld dat ek eerder kies om iets te wys wat mense sal opbeur.
“Natuurlik beleef ek minder goeie dae, en soms sukkel ek ook met die negatiewe. Maar ek kies om dit nie te wys nie; ek hanteer dit eerder saam met my familie en vriende.
“In my hart is ek ’n positiewe mens. En die slegte dinge in die lewe het ook gehelp om dit in my te vorm.”
Soos ’n mens kan verwag, is daar soms negatiewe kommentaar op haar profiel. Soos dit maar is by iemand wat ’n groot aanhang by die publiek geniet. Hoe dink Leah daaroor?
“Toe ek jonger was, het ek sommer sulke kommentaar uitgevee. Maar deesdae sal ek daarop reageer. As iemand byvoorbeeld iets oor my skryf wat ek weet nie waar is nie – iets soos: ‘Jy dink darem baie van jouself’ – sal ek daardie persoon antwoord.
“Dis mos baie maklik om persoonlik of afbrekend te wees as jy anoniem is, as jy dit op die foon se skerm kan doen. Sal jy so iets vir my sê as ek by jou is?
“Ek leer dus deur ondervinding hoe om sulke dinge op sosiale media te hanteer.”
Klik hier om meer te lees.
Die berig is oorspronklik deur Lig gepubliseer en met toestemming hier gepubliseer.