Luidens ’n verklaring wat Woensdag deur Eskom uitgereik is, het dit die Tshwane-metro se voorgestelde plan om sy uitstaande rekening te betaal, verwerp.
Eskom sê dit oorweeg om die metro se krag te ontkoppel, nadat dit versuim het om die R1,6 miljard te betaal wat op 17 Augustus 2022 verskuldig en betaalbaar was. Tshwane-metro het volgens die kragreus tot op hede nog net R448 miljoen van dié elektrisiteitsrekening betaal.
Dit beteken dat die metro nou amptelik in donker gedompel kan word.
Ontkoppelings is volgens Eskom ’n nodige stap om die betaling van sy agterstallige skuld te verseker.
“Eskom het hierdie voorstel as onaanvaarbaar verwerp gegewe sy huidige finansiële posisie,” lui ’n verklaring deur die kragreus. “Die munisipaliteit het die kragvoorsiener verseker dat hy die uitstaande R1,2 miljard sal betaal, maar hy het net ’n betaling van R80 miljoen gemaak. Hierdie wisselvallige betalings plaas groot druk op Eskom se vermoë om voort te gaan om die metro van elektrisiteit te voorsien.”
“Die kragvoorsiener het op 24 en 30 Augustus 2022 met die munisipaliteit se bestuur vergader om ’n verdere beroep op die metro te doen om die uitstaande betaling te maak.”
Die Stad het voorgestel om die uitstaande betaling na 76 dae te vereffen wat nie in ooreenstemming is met die kontrak wat hy met Eskom het nie en ook nie met die Wet op Munisipale Finansiële Bestuur (MFMA) nie.”
In ’n verklaring Donderdag het die Tshwane-metro gesê dat dit sal voortgaan om betalings aan Eskom te maak, ten spyte van “onnodige dreigemente”.
“Die Stad Tshwane het met teleurstelling kennis geneem van die kommunikasie wat deur Eskom uitgereik is, wat aandui dat hulle die betalingsplan wat die metro voorgestel het, van die hand gewys het, wat uiteindelik sou verseker het dat die volle uitstaande bedrag binne 29 dae na die sperdatum vereffen sou word.
“Ons wil weereens herhaal dat ons daartoe verbind is om die volle uitstaande balans so vinnig as moontlik te vereffen.
“In die belang om korrekte inligting aan ons inwoners te verskaf, is dit belangrik om daarop te wys dat Eskom se mediaverklaring, wat aandui dat ons aangebied het om die uitstaande bedrag binne 76 dae te vereffen, misleidend is. Die Stad het ’n hersiene betalingsplan van 29 dae voorgestel, wat Eskom nou verwerp het.
“Ons het verskeie gesprekke met Eskom gehad en ’n hersiene betalingsplan aan hulle voorgelê wat gebaseer is op die realistiese finansiële situasie van die Tshwane-metro.
“Die metro verstaan die dringendheid om die volle uitstaande bedrag te vereffen. In die hersiene betalingsplan wat ons by Eskom ingedien het, het ons daartoe verbind om die volle uitstaande bedrag teen 16 September 2022 te vereffen.
“Ons wil graag herhaal dat die uitstaande bedrag wat aan Eskom verskuldig is slegs betrekking het op Julie 2022 en alle vorige skuld is betaal. Verder is die uitstaande saldo op die lopende rekening slegs 14 dae agterstallig.
“Eskom het ook in hul verklaring aangedui dat hulle sal voortgaan om die Stad te ontkoppel. Laat ek dit duidelik stel deur te sê dat so ’n optrede onwettig sou wees,” sê Sipho Stuurman, Tshwane-metro se woordvoerder.
“Indien enige sodanige aksie gevolg word, sal die Stad Eskom onmiddellik verbied om voort te gaan.”
Lees die Tshwane-metro se verklaring hieronder: