Die Portugal-sokkerster Cristiano Ronaldo (37) sal Manchester United met onmiddellike effek verlaat.
Die besluit volg op ’n omstrede onderhoud waarin die 37-jarige die klub gekritiseer het en gesê het hy het “geen respek” vir die bestuurder Erik ten Hag nie.
Albei partye het verklaar dat Ronaldo se uittrede “wedersyds ooreengekom is”.
Ronaldo het geen kans op ‘n terugkeer gehad ná sy onderhoud met Piers Morgan op TalkTV nie.
“Die klub bedank hom vir sy groot bydrae gedurende twee tye op Old Trafford,” het ‘n verklaring van Manchester United gesê.
Hulle het “hom en sy gesin sterkte toegewens vir die toekoms” en bygevoeg “dat almal by Manchester United daarop gefokus bly om die span se vordering onder Erik ten Hag voort te sit en saam te werk om sukses op die veld te lewer”.
Ronaldo is saam met Portugal by die Wêreldbeker-sokkertoernooi in Katar en gaan hulle Donderdag aanvoer in hul openingswedstryd van Groep H teen Ghana.
“Na gesprekke met Manchester United het ons onderling ooreengekom om ons kontrak vroeg te beëindig,” het ‘n verklaring van Ronaldo gesê.
“Ek is lief vir Manchester United en ek is lief vir die ondersteuners, dit sal nooit ooit verander nie. Dit voel egter soos die regte tyd vir my om ‘n nuwe uitdaging te soek.
“Ek wens die span alle sukses toe vir die res van die seisoen en vir die toekoms.”
Jy kan die onderhoud hier kyk:
Bron: BBC / The Sun