Webtuistes soos Jacaranda, Maroela Media, The Citizen en 2OceansVibe was sedert Woensdag 1 Februarie af ná ʼn kuberaanval op die internetdiensverskaffer RSAWeb.
Rudy van Staden, uitvoerende hoof van RSAWeb, het in ’n e-poskommunikasie aan sy kliënte Sondagaand bevestig dat sy netwerk platgetrek is deur ’n “hoogs gesofistikeerde kuberaanval”.
“In die vroeë oggendure van Woensdag, 1 Februarie 2023, was RSAWeb die teiken van ’n hoogs gesofistikeerde kuberaanval,” het van Staden gesê.
“Met ontdekking is stappe onmiddellik gedoen om die bedreiging te beperk en ons stelsels te beveilig. Gegewe die gesofistikeerde aard van hierdie aanval, is die herstelproses hoogs kompleks,” het hy gesê.
“Ons is tans besig om hierdie dienste te herstel en verwag om die meerderheid van hierdie kliënte binne die volgende 24 uur te laat herstel, met die res daarna.”
Van Staden het gesê hulle is nie die enigstes wat deur dié aanval getref is nie. Hy het ook gesê hulle glo nie dat enige data verkry of misbruik is as gevolg van die aanval nie.
“Die betrokke owerhede is ingelig, en ons het ook onafhanklike professionele kuberveiligheidsadviseurs betrek.”