Tlali Tlali, woordvoerder van die Staatsinligtingstegnologie-agentskap (SITA), het in ’n verklaring bevestig dat dit bewus is dat sommige regeringswebwerwe tans aflyn is, weens skade aan SITA se infrastruktuur in die omgewing van ’n gebied waar daar onrus was en rommel verbrand is.
Die volgende webtuistes word onder andere geraak: Die regering se amptelike webtuiste (gov.za), die Parlement se webtuiste, die Suid-Afrikaanse Polisiediens (SAPD) se webtuiste en die Onafhanklike Polisieondersoekdirektoraat (Opod) se webtuiste.
Talle ander webwerwe van die regering, wat nie hierbo genoem word nie, is ook sedert vanoggend aflyn weens dade van vandalisme in Thembisa.
“Neem asseblief kennis dat SITA bewus is van die situasie en aandag gee aan die situasie om dienste te herstel,” lui ’n verklaring. “Die stilstand is weens skade aan SITA se infrastruktuur in die omgewing van ’n gebied waar daar onrus was en rommel verbrand is.”
“SITA se tegniese span werk saam met die diensverskaffer om beskadigde infrastruktuur te herstel en/of te vervang om dienste so spoedig moontlik te herstel.”
“’n Ondersoek sal van stapel gestuur word om die omstandighede vas te stel wat tot die skade aan die infrastruktuur gelei het. Ons waardeer u geduld en begrip gedurende hierdie tyd, en ons vra opreg om verskoning vir enige ongerief wat aan ons kliënte en die publiek in die algemeen veroorsaak is.”
