Daar is blykbaar niks daaraan gedoen nie.
Deur Oliver Meth (GroundUp)
Op 11 Junie 2022 het ’n tronkbewaarder by die Mangaung-korrektiewe sentrum ’n e-pos aan die Adjunkminister van Korrektiewe Dienste, Phathekile Holomisa, gestuur waarin hy gevra het: “Is jy bewus daarvan dat die gevangene wat ‘na bewering’ by die Mangaung-korrektiewe sentrum doodgebrand het, vermoedelik gehelp is om te ontsnap deur die amptenare van die Mangaung-korrektiewe sentrum en departement van korrektiewe dienste by die gevangenis?”
Die betrokke gevangene was Thabo Bester, bekend as die ‘Facebook-verkragter’, wat lewenslange tronkstraf vir moord en ’n reeks verkragtings uitgedien het.
Die departement van korrektiewe dienste het berig dat Bester op 3 Mei 2022 om 03:35 in die Mangaung-korrektiewe sentrum gesterf het. Die amptelike weergawe was dat Bester homself in sy sel aan die brand gesteek het. Die fasiliteit word bestuur deur die multinasionale sekuriteitsmaatskappy G4S.
GroundUp het sedertdien bewyse aangemeld wat aandui dat die liggaam wat in die sel gevind is, nie Bester s’n was nie en dat Bester in werklikheid ontsnap het. Hy is sedert die veronderstelde datum van sy dood verskeie kere in die openbaar opgemerk. Die liggaam in die sel is nie geïdentifiseer nie, maar die persoon wat gesterf het, het erge trauma opgedoen voordat dit aan die brand gesteek is, volgens ’n lykskouer se verslag. ’n Polisiedossier wat met die saak verband hou, is van selfmoord na moord verander.
Maande na sy Junie-e-pos, op 8 November, het die bewaarder nog ’n e-pos aan Holomisa gestuur:
“Goeiedag Meneer, ek het u in kennis gestel van die Thabo Bester-ontsnapping [in] my vorige e-pos … u kantoor en … die DKD [het] my e-posse geïgnoreer wat u hiervan in kennis stel.”
Dit blyk dat geen stappe geneem is na aanleiding van die bewaarder se e-posse nie.
Tog, volgens Chrispin Phiri, woordvoerder van die ministerie van justisie, is die adjunkminister nie in staat om die betrokke e-posse op te spoor nie, maar hulle doen alles in hul vermoë om dit op te spoor.
Die bewaarder het gesê nadat hy die beweerde “toesmeer” aan die adjunkminister aangemeld het, is hy geviktimiseer en later van die fasiliteit verplaas.
“Dit is nie die eerste voorval wat ek aangemeld het nie. Ek het vir hom [adjunkminister] ’n aantal e-posse gestuur oor die bendestekings, korrupsie en behandeling van gevangenes,” het die bewaarder aan GroundUp gesê.
Holomisa het voorheen geantwoord op ’n e-pos wat die bewaarder op 19 April 2022 aan hom gestuur het. Dié e-pos het gehandel oor toestande by die tronk.
Die bewaarder het bygevoeg dat dit ’n “ope geheim” is dat die lyk in Sel 35 nie dié van Bester is nie en “Ek het die [adjunk-] minister in kennis gestel … die manier waarop die hele [misdaadtoneel] ding hanteer is, is daar geen protokol gevolg nie. Daar [was] te veel rooiligte en ons [kollegas] vermoed dit was die binnewerk van nagskof [personeel].”
Bewerings wat die bewaarder oor die gebeure van die aand van Bester se ontsnapping gemaak het, bevestig met ander bronne waarmee GroundUp gepraat het. GroundUp is besig om ’n tydlyn van die gebeure van 3 Mei saam te stel en beoog om dit mettertyd te publiseer.
Die berig is oorspronklik op GroundUp se webtuiste gepubliseer en met vergunning hier geplaas.
Jy kan die berig op GroundUp lees deur hier te klik.
LEES OOK: