StatsSA se nuus vandag dat voedselpryse die afgelope jaar met gemiddeld 14% gestyg het, moet president Ramaphosa en sy kabinet uiteindelik aanspoor om die regte ding te doen vir die miljoene kinders en volwassenes in Suid-Afrika wat honger ly.
Dít is die mening van John Steenhuisen, DA-leier.
“Voedselprysstygings was ’n massiewe ramp vir arm huishoudings en veroorsaak wydverspreide, erge en onnodige lyding,” sê Steenhuisen.
Die DA het deurgaans ’n werkbare reaksie op die lewenskostekrisis voorgestel, insluitend in sy Alternatiewe Begroting in Februarie.
Dit bestaan uit ingrypings om onmiddellike verligting te bring, tesame met ekonomiese hervormings om die grondoorsake van hierdie verwoestende krisis aan te pak.
“Ek herhaal hierdie voorstelle nou, in die hoop dat die ANC-regering uiteindelik die nasie se belange bo ANC-belange sal stel,” sê Steenhuisen.
Die DA het die volgende voorstelle ter tafel gelê:
Onmiddellike verligting
Om onmiddellike verligting van honger te bring, moet die regering die lys van BTW-vrye kosse uitbrei om noodsaaklike items soos hoender met been, beesvleis, geblikte boontjies, koringmeel, margarien, grondboontjiebotter, babakos, tee, koffie en poeiersop in te sluit.
Dit sal die las op die armste 50% van Suid-Afrikaners, wat buitensporig deur BTW op hierdie items geraak word, verlig.
Die regering moet ook brandstofheffings verminder en sonkragbelastingkortings verhoog, om verdere verligting vir huishoudelike begrotings te bring, om die hoë koste van die vervoer van voedsel te verminder en om die energiekrisis wat ons ekonomie knou, te verlig.
Hierdie ingrypings is maklik om te implementeer, en dit is bekostigbaar as die regering dit koppel aan behoorlike ekonomiese hervorming wat die ekonomie oopmaak vir werk en groei, en korrupsie besnoei.
Ekonomiese hervorming
Miljoene werksgeleenthede sal in Suid-Afrika geskep word as ons dit ’n plek maak wat beleggings en skaars vaardighede lok, ’n plek waar klein besighede maklik kan begin en groei.
Om mense weer op hul voete te kry deur hulle in werk te kry, is die beste manier om veerkragtigheid teen honger te bou.
Een sleutelhervorming is om private titel aan alle grondhervormingsbegunstigdes op staatsgrond en grondeienaars in kommunale gebiede te verskaf, om mense te bemagtig om grond produktief te gebruik.
Geïsoleerd
Ministers is heeltemal geïsoleer van die uitwerking van inflasie en die lewenskostekrisis, aangesien belastingbetalersgeld steeds toegewys word om hul buitensporige leefstyl te finansier.
Die ANC se versuim om ekonomiese maatreëls in te stel wat stygende koste en voortdurende kragonderbrekings aanspreek, demonstreer hul onverskilligheid teenoor die sukkelende bevolking.