Pasiënte by die Nyanga-gemeenskapsdagkliniek sê dienste het agteruitgegaan.
Deur Peter Luhanga (GroundUp)
- Bejaardes kla oor swak dienste by die Nyanga-gemeenskapsdagkliniek in Kaapstad.
- Hulle sê daar is voorraadopsies op sekere medikasie, lang wagperiodes in toue.
- Die Wes-Kaapse departement van gesondheid het pasiënte versoek om al hul klagtes aan te meld sodat “regstellende maatreëls ingestel kan word om die kwaliteit van sorg te verbeter”.
- Siek en bejaardes sê hulle wag vir ure in die koue en reën buite die Nyanga by die gemeenskapsdagkliniek net om ’n afspraak te maak om ’n dokter te sien. Sommige pasiënte kla ook dat die kliniek se voorraad chroniese medikasie opraak.
Bukelwa Gabuza (79) sê sy woon sedert 1981 in Mau-Mau, Nyanga. Sy word vir artritis, maagsere en ekseem behandel, en sy gebruik ’n kierie om te loop. Gabuza sê sy kon nie haar daaglikse medikasie neem niem omdat die kliniek nie voorraad het nie. Sy en ander pensioenarisse wat vir etlike ure nie meer kan staan nie, betaal nou jong mans R50 om namens hulle tou te staan.
Sy meen dienste by die kliniek het versleg sedert die provinsiale gesondheidsdepartement in Julie verlede jaar die bestuur by die Stad Kaapstad oorgeneem het. Sy beweer dat pasiëntvouers wegraak, verpleegsters onbeskof is en daar is net een dokter aan diens. Sy sê ma’s met babas het nie kleedgeriewe nie en die toilette is vuil.
“Toe die kliniek deur die Stad bestuur is, het ons toegewyde sorg gehad vir mense op chroniese medikasie. Ons is met waardigheid behandel. Nou is ons gemeng met ernstig siek pasiënte,” het sy gesê.
Toe Gabuza verlede maand haar medikasie gaan haal het, moes sy met leë hande huis toe gaan nadat sy ure by die kliniek deurgebring het, sê sy.
Sy sê sy leen die medikasie vir haar maagsere by ’n buurman wat na die New Somerset-hospitaal gaan. “Ek moet die pille hê. Die [privaat] apteke vra R300 per pakkie,” sê sy.
Gabuza sê haar pensioen is skaars genoeg om kruideniersware vir die maand te koop en haar begrafnispolis te betaal. “Sommige mense dink as jy met jou kinders in die huis woon, gee hulle vir jou geld. Maar kinders het hul eie probleme,” sê sy.
Gemeenskapsaktivis Sindiswa Godwana, wat Usindiso Community Development bestuur, sê hulle bestuur programme om pensioenarisse te help om hul behandelingskedules by te hou. Sy sê hulle het opgemerk dat die diens by die Nyanga-Oos-kliniek “baie swak” is.
“Selfs wanneer hulle baie siek is, word mense weggewys omdat hulle nie eers ’n afspraak gemaak het nie,” sê Godwana.
Monique Johnstone, kommunikasiebeampte van die Wes-Kaapse departement van gesondheid, het gesê die kliniek het slegs beperkte dienste aangebied voordat die provinsie oorgeneem het. Gevra oor sommige van die kwessies by die kliniek, het sy om verskoning gevra en gesê die departement werk daaraan om dienste te verbeter “terwyl sy probeer om ‘n groeiende gemeenskap te akkommodeer”.
Sy het gesê mense word aangemoedig om die probleme met die kliniekbestuurder of die hulptoonbank te bespreek sodat dienste verbeter kan word. “Ongelukkig, as ’n klag nie aangemeld word nie, kan ons nie regstellende maatreëls in plek stel om die kwaliteit van sorg aan ons pasiënte te verbeter nie,” het sy gesê.
Sy het gesê ’n huidige projek om pasiënte se mediese verslag te argiveer en saam te voeg, sal die klagtes oor verslae wat vermis word aanspreek en toegang tot dienste “baie makliker en minder tydrowend sal maak.”
Sy het gesê pasiënttoilette word daagliks skoongemaak. “Ons het tans twee vakante skoonmakerposte en word gekonfronteer met verskeie onbeheerbare omstandighede soos siekte, noodverlof en ander onvoorsiene uitdagings wat mag opduik, maar ons probeer altyd verseker dat die toilette skoon bly.”
Die berig is oorspronklik op GroundUp gepubliseer en hier gepubliseer en klik hier om meer te lees.