Hermanus-polisie ondersoek ’n huisroof sowel as die diefstal van ’n motorvoertuigsaak ná ’n voorval Dinsdagaand om 21:30 op ’n plaas, Hemel en Aarde-vallei, tussen Hermanus en Caledon.
“Voorlopige verslae dui daarop dat vier onbekende mans wat klapmusse gedra het, waarvan een na bewering gewapen was, die perseel betree en die 53-jarige vrou gedreig het nadat hulle ’n hond geskiet en gewond het. Hulle het haar met kledingstukke vasgebind en die huis geplunder,” het luitenant-kolonel Malcolm Pojie, polisiewoordvoerder in die Wes-Kaap, gesê.
“Hulle het toe waardevolle items, insluitend juweliersware, geneem en van die toneel gevlug in ’n Toyota-dubbelkajuitbakkie wat aan die slagoffer behoort. Die bakkie is later verlate by die Hemel en Aarde-vallei gevind, sowat 7km van die misdaadtoneel af.”
Intussen het die slagoffer daarin geslaag om haarself te bevry en die paniekalarm vir hulp geaktiveer.
Die verdagtes is steeds op vrye voet.
“Ons doen ’n beroep op enigiemand met inligting om asseblief die Hermanus SAPD of Crime Stop-nommer by 08600 10111 te skakel,” het Pojie bygevoeg.