Die Gautengse departement van e-regering het Donderdag bevestig dat R1,7 miljard bestee sal word om misdaad deur middel van e-polisiëring in die provinsie te bekamp. Dit sluit talle kringtelevisiekameras, hommeltuie en ander misdaadbestrydingstegnologieë in.
MyBroadband berig dat die LUR vir e-regering, navorsing en ontwikkeling, Mzi Khumalo, tydens ’n sitting van die Gautengse provinsiale wetgewer op Donderdag, 25 Mei 2023, bevestig het dat effektiewe “e-polisiëring” grootliks geprioritiseer sal word in die departement se toegewysde begroting van meer as R1,7 miljard.
“Die departement het onder meer gepoog om die verkryging en bestuur van misdaadbekampingstegnologie te prioritiseer om e-polisiëring vir Gauteng te vestig,” het die departement gesê.
Dit kom nadat die Gautengse premier, Panyaza Lesufi, laasjaar versoek het dat innoverende metodes en die ontwikkeling van tegnologieë ingesluit moet word in wetstoepassing om die voorkoming en bekamping van misdaad te bevorder.
Onder hierdie tegnologieë wil die departement kringtelevisiekameras oor elke groot snelweg vestig en ’n sakesentrum stig wat dit kan monitor.
Dit sal veral in gebiede geloods word wat as “brandpuntgebiede” bestempel word waar misdaad hoofsaaklik plaasvind.