Deur Heléne Meissenheimer (LiG)
Haar tekkies het haar voete so seergemaak dat sy die voorkante afgesny en met groen “duct tape” toegeplak het. Maar van ophou stap aan die RSG Red ’n Plaas-Camino was daar nie sprake nie.
Surita was vanjaar een van die meer as 100 stappers wat 166 km se stowwerige grondpaaie in wind en weer en warm son trotseer het.
Sy het tydens die staptog vertel sy wou nie gehad het dit moet ophou nie.
Vir dié ma van die Boer soek ’n vrou-deelnemer Neil Bruwer was hierdie staptog haar manier om dankie te sê aan almal wat Karoodorpe soos haar grootworddorp Williston tydens die droogte gehelp het. Dié droogte duur al langer as agt jaar. Soos sy dit so mooi in haar sagte stem stel: “Om dankie te sê vir die engele oor die hele land wat die wind onder ons vlerke was.”
Surita en haar man Wicus moes hul plaas verhuur en dorp toe trek. Sy vertel hoe mis sy die wye uitsig oor die veld. Wanneer sy dus die kans kry … stap sy Camino’s. Hierdie was haar tweede een. Daar is ook deurnagstaptogte, of sommer net ’n lekker stappie op Williston se plaaspaaie.
Soms stap van haar kollegas by die dorpskool, waar sy die skoolsekretaresse is, ook saam. Sy het hulle vertel hoe goed stap vir hul “binnemens” kan wees.
Klik hier om die volledige berig op LiG se webtuiste te lees. Dit is met vergunning hier geplaas.