Solidariteit het vandag aangedui dat sy voorkeurkandidaat vir uitvoerende hoof van Eskom is Dan Marokane, met Ayanda Noah as tweede keuse. Dit volg nadat die kortlys vir die pos van Eskom se uitvoerende hoof bekendgemaak is.
Volgens Solidariteit beskik sowel Marokane as Noah oor genoegsame bestuurservaring, en die vereiste tegniese kennis wat hulle in hul ingenieursverwante agtergrond opgedoen het. Albei kandidate se werkservaring binne en buite Eskom getuig van goeie oordeel en deurdagte bestuursbesluite.
“Die beste uitvoerende hoof vir Eskom is die een wat bereid sal wees om die energievoorsiener te kan stuur sonder om politieke inmengery te duld of die knie voor die ANC-regering se wandade te buig. Eskom se voormalige uitvoerende hoof, André de Ruyter, het bewys dat dit nie ʼn maklike taak is nie,” sê dr. Dirk Hermann, bestuurshoof van Solidariteit. “Dit is juis om hierdie rede dat Solidariteit die aanstelling van Marokane steun. Benewens sy kwalifikasie en ondervinding, het hy reeds bewys dat hy nie sal skroom om in die beste belang van Eskom op te tree nie, selfs al beteken dit dat hy guns by politici verloor.
“Dit is betreurenswaardig dat ʼn uitvoerende hoof van ʼn entiteit soos Eskom oor vaardighede moet kan beskik wat die entiteit teen regeringsuitbuiting kan beskerm. Dit is egter ʼn vereiste wat ʼn deurslaggewende rol sal speel in die suksesvolle ommekeer van die kragvoorsiener. Dit is van kardinale belang dat iemand met sterk bestuursvaardighede, politieke kennis en die wilskrag om die regte besluite te neem in hierdie pos aangestel word. Na ons oordeel is Dan Marokane die mees geskikte persoon op hierdie kortlys,” sluit Hermann af.