Showmax het in ’n verklaring bevestig dat hy onlangs bewus gemaak is van ’n eksterne voorval waar ’n onbekende party ’n klein aantal intekenaar-aanmeldbesonderhede op ’n onwettige webwerf gepubliseer het.
MyBroadband berig egter dat dit onlangs ’n plasing op ’n forum ontdek het wat beweer dat dit 27 911 Showmax-gebruikersname en -wagwoorde aanbied.
“Toe ons hieroor in kennis gestel is, het ons kuberveiligheidspan ’n ondersoek begin om die omvang en aard van die voorval te bepaal,” het Laura Cooke, die kommunikasiehoof by Showmax, in die verklaring gesê. “Ons aanvanklike ondersoek het getoon dat sommige van ons kliënte se e-posse en wagwoorde gekompromitteer is.”
Kliënte se finansiële inligting bly egter veilig.
“Die geaffekteerde data is nie meer aanlyn beskikbaar nie, en alle kliënte wat geraak word, is in kennis gestel en aangeraai om hul wagwoorde te verander,” sê Cooke.
“Die beskerming van die sekuriteit en privaatheid van ons kliënte is ons topprioriteit. Ons wil beklemtoon dat dit ’n eksterne voorval was en dat daar geen bedreiging van Showmax se databasisse was nie.
“Ons hou streng by ons privaatheidsregulasies en is daartoe verbind om ons sekuriteitsmaatreëls te verbeter om ons kliënte se waardevolle inligting te beskerm. Wees verseker dat ons alle nodige stappe neem om die volgehoue veiligheid van jou data te verseker. Ons sal jou op hoogte hou van enige verwikkelinge,” sluit Cooke af.