Die heroïen wat in die vragmotor gevind is.
(Foto bron: Valke)
’n 49-jarige man is Sondag in Mpumalanga in hegtenis geneem vir die besit van heroïen ter waarde van R75 miljoen. Die man is ’n vragmotorbestuurder wat vanaf Mosambiek gereis het.
Kolonel Katlego Mogale, die woordvoerder van die Valke, het gesê: “Die brandweer het gehelp met die oopmaak van die versteekte kompartement, waar 250 x 1 kg heroïen “bricks”, met ‘n geraamde straatwaarde van R75 miljoen, ontdek is.”
Die nasionale hoof van die Valke, Luitenant-Generaal Godfrey Lebeya, het gesê: “Die arrestasie was die gevolg van die Trilaterale Beplanningsel, wat ‘n span is wat gestig is deur die ministeries wat verantwoordelik is vir die polisiëring van dwelms in die Republieke van Suid-Afrika, Mosambiek en Tanzanië met die doel om heroïenhandel in Suidelike Afrika teen te werk.”
Die man sal na verwagting op 19 Julie in die Carolina-landdroshof verskyn op aanklagte van die besit van onwettige dwelms met die doel om dwelmmiddels te verkoop en te versprei.