Ongeveer R12 miljoen se onwettige Derby-sigarette.
(Foto bron: Verskaf deur die SAPD)
’n 44-jarige Zimbabwiese man is in hegtenis geneem omdat hy na bewering probeer het om onwettige sigarette, ter waarde van meer as R12 miljoen, na Suid-Afrika te smokkel.
Die man het na bewering Suid-Afrika binnegesluip in ‘n tyd wat daar beurtkrag by die grenshek was. Daar word beweer dat ‘n polisiebeampte die vragmotor deurgelaat het.
Polisiewoordvoerder, luitenant-kolonel Amanda Funani, sê die man het Suid-Afrika Vrydag vanaf Botswana binnegekom via die Skilpadhek-poort. “Trokke wat die land binnekom of verlaat, word nie toegelaat om dit tydens beurtkrag te doen nie, aangesien rekenaars aflyn is,” het sy gesê.
Die bestuurder het Maandag in die hof verskyn.