Die vervoervakbond, SATAWU, het kommer uitgespreek oor die voortgesette aanvalle op pendelbusse en het gevra dat die betrokkenes vinnig in hegtenis geneem word.
Drie PUTCO-busse is Maandag deur ‘n groep gewapende rowers by die vervoernutsdiens se Soshanguve-depot in Pretoria aangeval. ’n Busbestuurder is tydens die gewapende roof geskiet en gewond. Passasiers is van hul persoonlike besittings en selfone beroof.
SATAWU se Amanda Tshemese sê wat kommerwekkend is, is dat hierdie voorval nie die eerste in sy soort is nie. “Ons is in oorlog met hierdie misdadigers en wat meer kommerwekkend is, is die feit dat hierdie oortreders steeds op vrye voet is en moontlik ander misdade pleeg. Die veiligheid van die bestuurders kom eerste en ongelukkig het ‘n busbestuurder ‘n skietwond opgedoen en pendelaars het hul persoonlike besittings verloor, dit is nie aanvaarbaar nie en dit is baie ontstellend dat dit nie die eerste voorval in Tshwane is nie.”