Die Universiteit van Fort Hare in die Oos-Kaap.
(Foto bron: The Daily Vox)
Nog ’n persoon is in verband met moordsake by die Universiteit van Fort Hare in die Oos-Kaap in hegtenis geneem. Dit bring die aantal arrestasies op ses te staan.
Lindokuhle Manjati 31, ‘n polisiebeampte wat by Mthatha se Madeira-polisiestasie gestasioneer is, het Maandag vlugtig voor die Alice-landdroshof verskyn. Manjati staan tereg op twee aanklagte van moord en vier aanklagte van poging tot moord. Hy sal op 10 Augustus weer in die hof wees vir borgtogaansoek.
In Junie is die borgtogaansoeke van drie van die vyf mans wat daarvan beskuldig word dat hulle twee werknemers van die Universiteit van Fort Hare vermoor het, in die Dimbaza-landdroshof in die Oos-Kaap geweier. Beskuldigdes nommer een en twee, Bongani Peter en Wanini Khuza, het gekies om hul borgtogaansoeke te laat vaar.
Die beskuldigdes word verbind met die moord op die visekanselier se lyfwag, Mboneli Vesele, en vlootbestuurder, Petrus Roets. Hulle staan tereg op aanklagte van moord, poging tot moord en onwettige besit van vuurwapens. In hul slotbetoë tydens die vorige hofverskyning het hul verdediging aangevoer dat die staat se saak swak, ongegrond en teoreties was.
Landdros Mhlanga Bala het met sy uitspraak gesê die applikante – beskuldigdes twee, vier en vyf – het versuim om die hof dringende redes vir hul vrylating te gee en dat die swakheid van die saak in hierdie stadium onderhewig is aan oorweging. Landdros Bala het ook bygevoeg as beskuldigde vyf, wat sy paroolvoorwaardes in ‘n ander saak oortree het, op borgtog vrygelaat sou word, sal hy waarskynlik meer misdade pleeg.