Foto bron: Verskaf
Die Demokratiese Alliansie (DA) in die Noord-Kaap is bekommerd dat die polisie se reaksietyd die stadigste in die hele land is.
Dit kom nadat ‘n reaksie van die minister van polisie, Bheki Cele, verlede week ontbloot het dat inwoners in die Noord-Kaap in misdaadverwante noodgevalle vir meer as ‘n uur aan die genade van misdadigers oorgelaat word weens die stadige reaksietyd van die Suid-Afrikaanse Polisiediens. (SAPD).
SAPD se stadige reaksie op misdaad is geen verbasing nie gegewe die ernstige gebrek aan operasionele voertuie wat vir polisiekantore by stasies regoor die provinsie beskikbaar is. Toesiginspeksies wat verlede jaar by verskeie polisiekantore gedoen is, het aan die lig gebring dat baie voertuie óf op bakstene by stasies staan, óf by die provinsiale motorhuis en wag dat onderdele van diensverskaffers in ander provinsies verkry word.
Die DA is nie tevrede dat die provinsie ‘n voertuigherstelkontrak met diensverskaffers in Johannesburg en Durban het nie, aangesien dit die omkeertyd van die herstel van SAPD-voertuie in die provinsie drasties vertraag. Dit is voorheen deur die Provinsiale Polisiekommissaris, Genl. Maj. Koliswa Otola, in ‘n vergadering met die DA se provinsiale woordvoerder vir vervoer, veiligheid en skakeling, Ofentse Mokae, bevestig.
Polisiëring moet versterk word om die toename in misdaad voldoende aan te spreek, met die derde kwartaallikse misdaadstatistieke wat ‘n styging in veral geweldsmisdade openbaar, soos poging tot moord, roof met verswarende omstandighede en aanranding met die doel om ernstig te beseer.
Dit is van kardinale belang dat die herstel van polisievoertuie gedesentraliseer word sodat daar onmiddellik op misdaad gereageer kan word, veral omdat die provinsie al hoe meer grootstadmisdade ondervind en gevaarliker word namate misdadigers munt slaan uit die SAPD se swakhede.
Die DA is daartoe verbind om die SAPD op te knap vir ‘n meer doeltreffende polisiediens. Ons moedig kiesers aan om Suid-Afrika van misdaad te red deur DA op 29 Mei 2024 te stem.