Foto bron: Verskaf
Die Kleuterzone Groep van Skole bied robotika as deel van hulle kurrikulum vir die kinders wat by hulle skoolgaan aan. AfriNUUS het onlangs met dié groep se Hoof van Robotika, Ronel Willemse, gesels om te verstaan waarom Kleuterzone juis besluit het om hierdie innoverende vak aan te bied.
Luidens Willemse wou Kleuterzone vir jong kinders van ‘n vroeë ouderdom af bemagtig om in die moderne wêreld te floreer.
“Ons lewe in ‘n wêreld waar tegnologie meer en meer gebruik word. Ons het dit dus goed gedink om ons kindertjies bloot te stel aan hierdie nuwe vooruitgang in tegnologie, maar op ‘n leer en speel wyse en in ‘n veilige gekontroleerde omgewing,” verduidelik sy.
Die groot vraag wat by baie sal opkom as hulle dink aan robotika wat vir kleuters aangebied word is hoe mens te werk sou gaan om hierdie komplekse idees vir hulle verstaanbaar te maak.
“Die Stimu-Zone Kodering en Robotika-program vir kleuters van 2 jaar tot 6 jaar fokus op
interaktiewe en innemende aktiwiteite wat in hul ontwikkelingsbehoeftes voorsien. Deur kleurvolle en stimulerende lesse word kinders op ‘n speel-speel manier aan
basiese konsepte van robotika bekendgestel,” het Willemse gesê.
Kleuterzone maak ook gebruik van musiek en storievertelling om hulle kodering en robotika klasse aan te bied.
Willemse het verder gemeen dat die insluit van Robotika by die Kleuterzone-leerprogram vir kinders help om probleemoplossingsvaardighede en kritiese denke aan te leer – iets wat altyd belangrik is in die lewe vorentoe.
“Om kleuters aan robotika bekend te stel, kan hul nuuskierigheid en verbeelding aanwakker, wat ‘n vroeë belangstelling in wetenskap, tegnologie en kreatiewe probleemoplossing bevorder. Deur praktiese aktiwiteite en interaktiewe leerervarings kan kleuters kritiese denkvaardighede en ‘n passie vir innovasie ontwikkel. Hierdie vroeë blootstelling lê ‘n sterk grondslag vir hul toekomstige verkenning en begrip van STEM-velde,” het Willemse bygevoeg.
Van die aktiwiteite wat Kleuterzone op steun om hulle Robotika klasse aan te bied sluit die opstel en programmering van ‘n robot in om ‘n sekere pad te navigeer of om ‘n doolhof te ontsnap. Kleuterzone meen verder dat hulle ook werkswinkels aanbied wat kleuters se ouers ook kan bywoon. Sodoende kan ouers hulle kleuters ondersteun deur robotike aktiwiteite en oefeninge tuis aan te bied.
Besoek gerus Kleuterzone se webtuiste vir meer inligting oor hulle skole en vakaanbiedings.